काठमाडौँ । बलिउड अभिनेता सोनु सुद नुवाकोट पुगेका छन् । भोटेकोशी बाढी प्रभावितलाई सहायता गर्न उनी बुधबार त्यहाँ पुगेका छन् । त्यहाँको बाढी प्रभावित स्थान देख्दा उनी निकै भावुक बनेका छन् । उनले त्यहाँ बाढी पीडितहरूसँग पनि कुराकानी गरेका छन् ।

पीडितले उनलाई घर लगायत सबै क्षति भएको दुःख सुनाएका थिए । सोही क्रममा उनले पीडितलाई सान्त्वना दिएका छन् । उनीसँगै मुम्बईबाट आएको सहायता टोली पनि प्रभावित थलो पुगेको छ ।त्यसअघि उनले काठमाडौँको एक गुम्बामा आश्रय लिएका बाढी प्रभावितलाई भेटेका थिए । उनले आश्रित बालबालिकालाई भेटेको तस्बिर सामाजिक सञ्जालमा पोस्ट गरेका छन् । जसमा उनले सबैलाई नेपाललाई सहयोग गर्न आग्रह समेत गरेका छन् । सुद मंगलबार काठमाडौँ आइपुगेका हुन् ।